44 Лемківска Ватра в Ждині 17-19.07.2026

Свято лемківской культури – 44 Лемківска ватра в Ждині то єдно з найголовніших і
найстарших культурних подій лемківской громади в Польщи. Юж веце як штирі десятиріччя ватра то місце стріч, пам’яти і живой культури – простір, в яким традиція не є самим музейний експонатом лем спільним досвідом, який маме «гев і тепер». То свято музики, слова, ремесла, спорту і штоденности, з корінями сягаючим глибоко до недрів Лемківщини.

В тім році зберамеся при ватрі з закликом: «Дома найліпше!» – простеньким і водночас глибоко зворушливим в контексті лемківских досвідів. Для лемків дім то не лем будівля. То спільнота, мова, пам’ять предків, запах дерева і диму кружляючий над ватром. То місце до якого ради ся вертают – даколи реально, даколи лем в оповіданях, піснях чи жестах. Для лемків, чию долю позначили виселіня, примусови міграції і счезнутя рідних сел, дім то штоси забране, а водночас фурт наново будуване в культурі і меджелюдских реляціях.

Ватра в Ждині од років повнит таку роль – символічного дому, в яким годен бити собом і найти спільноту. Вартає підчеркнути, же Лемківщина колиси била домом не лем для лемків, але тіж для ромів, євреїв і поляків. Багатокультурніст регіону стала його природнім краєвидом і важливим спадкоємством. Тот же аспект особливо підкреслиме при помочи тематичних стріч з представниками меншин чи бесід о пам’яти, співіснуваню і взаємной пошані.

Важливим посланням 44 Лемківской ватри є тіж ідея NO HATE. Свято лемківской культури ясно підкреслює, же кожен має право на то, би бити собом, виражати свою тотожніст і почуватися в безпеці. Лемківский дім є отворений – при спільним вогньови, ватрі, є місце для всіх, без огляду на походженя, мову, віру чи погляди.

Ватра пригадує, же ріжноманітніст не ділит лем збагачує, а спільнота родится з уважности і пошани. Лемківска ватра в Ждині то не лем фестиваль – то стріча людей, історії і емоцій. То повертаня домів, навіт коли кожен розуміє свій дім кус інакше.

Згідно з указом Європейского парламенту і Ради 2016/679 з 27 квітня 2016 рока о захисті персональних даних (RODO), який набрав сили 25 травня 2018 рока, інформуєме, же активна або пасивна участ в події «44. Лемківска ватра в Ждині» означат Вашу згоду на реєстрацію Вашого зображеня в формі: фотореляції, відеореляції і реєстрації звуку, яки організатор події – Об’єднаня лемків і одиниці залежни од організатора будут використувати в інформаційно-промоційних і архівальних діянях.
Веце о RODO можете прочитати гев: https://giodo.gov.pl/pl/569/9276