XXXVI Лемківска ватра «Весільна(с)» 20-22 липня 2018 р., Ждиня.
Лемківска ватра в Ждини юж од 36 років є місцьом для спільной, міжпоколіньовой забави, як тіж нагодом до інспіруючих стріч і дискусій. До нашой Ватри прилипли юж постійни точки програми, але фурт не здаєме пляцу бою і кожного рока намагамеся пропонувати Вам дашто нове. Минулорічна Ватра била для нас спомином Акції “Вісла” в єй 70 річницю. Розмір той травми має фурт вплив не лем на лемків, котри досвідчили єй безпосередньо, але тіж на нови поколіня. Попри то з надійом і оптимізмом позераме в майбутнє, зато темом тогорічного Свята лемківской культури буде лемківске весіля!
В лемківскій традиції весіля і обичаї, повір’я, обряди і практики, яки ся з ним в’яжут, мают принести молодятам любов, здоровля і успіх. Того хочеме жичити не лем собі, але тіж шитким учасникам Свята лемківской культури. Лемківску ватру з весільом в’яже дуже символічних дій. Ватра то місце, в яким стрічаются, розділени перед роками родини, молоди пізнают нових знаємих, а спільни танці і співи лунают до білого рана, аж сонечко зийде. Ватра то тіж велика родинна стріча, од якой б’є любов люди до себе і до того што своє, рідне. Зато рішили-зме вплести елементи весіля в нашу ватряну програму.
В програмі XXXVI Лемківской ватри в Ждини передвиділи-зме медже інчима: кольоровий весільний похід, який отворит тридневне святкуваня, стрічу весільних старостів з панельом, на яким побесідуєме о сучасних лемківских весілях, варштати весільних приспівок і в’язаня хусток, науку сващиня, стрічу з весільнима обрядами, виставу шлюбной фотографії, шоу ‘Лемківскє ранде по-темки’ і конкурс для лемківских пар.
Не буде бракувало традицийной і модерной музики, як тіж весільной «під ногу» і такой, што мож собі спокійно послухати.
Авторски і тематични стрічи то медже інчима:
«Мої дідове – розділ, якого не є» стріча з Марком Лущином в контексті книжки «Малий злочин»
«Сироп з полину. Вигнани в Акції “Вісла” – стріча з Павлом Смоленьским
Дилеми модерной тотожности – тематична стріча
Народни способи на гроки в Карпатах
Весільни обряди на Лемковині
Волохи в історії і культурі інчих націй
Тоти, котри ради мают активний випочинок, найдут на Ватрі XIV Лемківску спартакіаду, ціли три дни культурних анімацій для наймолодших ватрян на Ватрочці, вистави, теренови гри, прогулянки за зільом.
Love is in the air! Любов є в повітрі!
Любов є на Ватрі в Ждини!