Народна музика зо Львова

«Кажда хвилина в людским житю має свою пісьню», – бесідує Зоряна Дибовска, котра разом зо студентами театрального факультету в 2016 заснувала ансамбль Ягоди в місті Львові. В штирі особи подорожували по ріжних реґіонах України, жеби ліпше пізнати місцеви музични традиції. Завдяки тій величезній колекції зобраних сьпіванок про любов і житя Ягоди творят власну, захоплюючу мішанку звуків – при акомпаніаменті гітари, акордеону або дримби, перкусії. В 2020 році Ягоди видали свій перший альбум, виступлювали медже інчима на середньовічним фестивалю Ту Стань! во Львові в 2018 році, на Lodžie Worldfest в Чехах в 2022 році. Концерти мают характер представліня в єдним акті, адже Ягоди діют в сьвіті театру і реалізуют свій мюзикаль згідні з драматургічнима засадами. Музиканти будуют ріжноманітний і енергетичний сьвіт мелодій, ритмів, тем. Ходит о вслуханя ся в своє нутро, мітични звуки наших предків, подув вітру в поли… Госьці концерту сут загіпнотизувани танцьом голосів Ягід, котри творят вічний пульс людского існуваня. Сьпіванки Ягід сут як любовни листи з минулого, котри іщи не дотерли до своїх адресатів. Ягоди то єден з найбарже харизматичних україньских фолькових ансамблів!