«Полянім. З Польщи до Ізраїля» Кароліна Пшевроцка-Адерет
16.07.2021 18:00
Полянім то назва, з яком ідентифікуются жиди з Польщи в Ізраїлі. З єдного боку – багато років тому лишили широко поняти границі Речипосполитой, з другого – попри довгий час фурт відчувают тісний зв’язок з тима землями. Били «за жидівски» би остати в Польщи, а в Ізраїлі сут «за польски». В своїй тузі не сут єднорідни. Поєднує їх сентимент, ділят – обставини виїзду до Ізраїля. Як є бити жидом «з Польщи» в Ізраїлі, і як било бити жидом в Польщи розказує Кароліна Пшевроцка-Адерет в своїм неймовірним репортажі. Веце авторка оповіст в часі стрічи з нагоди 39 Лемківской ватри в Ждині.
«Вимазана границя. Сьлідами другой Речипоспоитой» Томаш Ґживачевскі
16.07.2021 20:00
Хоцки границ другой Речипосполитой юж ніт на мапі, она фурт на свій спосіб існує і даколи болит. Фурт жиє во споминах і умах тих, яких виселили, і тих яки не далися вигнати. Врізалася тіж в голови тих, яки на нову землю прийшли глядаючи кращого житя. «Вимазана границя» то нераз тяжка тема, не лем для меджелюдских відносин, але тіж медженародних. Лемківщина, Бойківщина, Гуцульщина, Тешинска Сілезія чи так звани «креси всходнє» то лем некотри з місц, до яких поїхав Томаш Ґживачевскі. Презентує їх в своїй книжці разом з цілим багатокультурним ґаліматіасом. При границі, навіт той неіснуючой, нич не є простим. Границя фурт ділит, хоцки юж єй ніт.
«Батьківщина яблук» Роберт Новаковскі
17.07.2021 20:00
«Батьківщина яблук» то книжка незвична, без огляду на тото чи буде ся нам любила чи ніт. До того – неокус контроверсійна. Зачати треба од того, же зістала написана на основі довоєнних і повоєнних історій етнічно-національного тигля південно-східньой Польщи, а до того барз міцно малююча образ акції «Вісла». Адже є дашто містичне в тім, же можеме бити з героями книжки коли пращаются з рідном хижом, їхают бидлячима вагонами і прибуют ствроити собі нове місце на сьвіті. Не годен забити тіж на тото, як творени сут герої книжки. Сут нима лемки, бойки, жиди, поляки а навіт «останній українец». Шитко згадане супроводят емоції – і гарди, незабутьни перши любови, і тоти тяжки – пов’язани з родиннима трагедіями, вигнаньом, незрозуміньом.
“Церкви південно-східньой Польщи” Вступне слово: Ярослав Ґємза, Дамян Новак; фотографії Каміль Палюшек
18.07.2021 18:00
Книжка о красі і тайні Церкви. На 500 сторінках вказує фотографії майже 200 церков з той частини історичной перемиской єпархії, яка по другій сьвітовій війні найшлася в межах Польщи, як тіж пару храмів розташуваних на півдни холмской єпархії. Ідучи без карти альбому береме участ в незабутній мандрівці шляхом церковной архітектури. Зачинаме од Шляхтови і Явирок, пак ідеме без цілу Лемківщину, Бескиди, Розточчя аж до Довгобичова і Городла на півночи.
«В нас кожен є пророком» Бартош Панек
18.07.2021 20:00
Татари з Польщи разом з лемками для багатьох сут лем кольоровим елементом давньой мультікультурной Польщи. Сут даяком льокальном еґзотиком, о якій не шитки знают. Бартош Панек в книжці «В нас кожен є пророком» прибує передставити широкій публиці тото, што остало з татарской культури в Польщи, адже крім лемківской чи українской, татарска куьтура є неодзовним елементом Польщи і зато мали би зме єй пам’ятати.