Рахуєся лем она
41. Лемківска Ватра в Ждині 14-16.07.2023

В рамках заплянуваной програми хочеме використати шитки елементи культури, яки поєднуются з жіночим єстеством і творилися довгима віками. Поцікавимеся образом жінки в народних співанках, традиційним облечиньом – а особливу увагу присвятиме біжутерії. Природни косметики і народне лікування зілями будут черговом точком програми Ватри.

Побесідуєме о тим, ким били і яку мали роль в царині давньой народной медицини босорки і шептухи. Презентувати будеме силуети жінок, яки діют в ріжних сферах і суспільних кругах: культура і традиція, гуманітарна допомога, мистецтво, ремесло чи письменництво.

Буде і серйозно, і весело, і по-спортовому. Приобіцюєме, же зо шитких мір будеме ся намагати би тоти три липневи дни в Ждині стали простором позитивной енергії, душевного спокою і приятельской атмосфери.