Оркестр св. Миколая

Оркестр св. Миколая не находит твердого місця медже музичнима жанрами. Од років ґаздує на ниві великого богатства народньой культури, творячи модерну музику не підпадаючу під хоц яке кваліфікуваня. Тота музика черпле повнима жменями з народних мотивів, та тіж з особистих музичних фасцинацій членів ансамблю. Їхні сьпіванки сут кріпко закорінени в традиції, што не вадит гнешнім слухачам добрі одчитувати їх зміст.

Музика має дуже площин. Нераз музики одночасно «оповідают», а їхні музични оповістки входят в несподівани інтеракції. Оркестр як єден з перших ансамблів взяв собі в репертуар музику інспірувану слов’яньском традиційом, передо шитким польском, лемківском ци гуцульском. Назва насамблю бере свій початок од святого Миколая з ікони в призабитой церкви. Своїх інспірацій ‘Миколаї’ не лишили до гнески.