Ватра ідейово, Ватра програмово

Свято Лемківской Культури „Лемківска ватра” в Ждині то найбільша і найбарже популярна культурна подія лемківского суспільства. Випрацювана роками марка фестівалю обгрунтувала його позицію як єдной з найбільших медженародних стріч Карпатского Регіону і Польщи. Ватра кожного рока гостит медже 6 а 10 тисяч ватрян – мешканців Бескиду, гости і туристів з Польщи і споза єй кордонів, медже інчима з Канади, України, Словаччина, США, Хорватії, Сербії, Мадяр, Австрії. Фестіваль, тирваючий три дни, є циклічний і лучит в собі культурови традиції і модерну форму рекреації. Ватру супроводят святкуваня роковин, Лемківска Спартакіада, вистави, конкурси, майстеркласи традиційного ремесла. На ждинскій сцені виступує што рока парусот виконавців народньой, фольковой, роковой ци джезовой музики та ріжних театралізуваних сценічних форм. Постійним елементом ватри є тіж презентація карпатских найтових традицій, сперта о досвіди мазярів родом з лемківского села Лося. Што не менче важливе – винятковий характер Свята Лемківской Культури підчеркуют численни візити визначних персон світа культури і політики.

„Лемківска Ватра” є тіж часом для спільного діалогу понад кордонами в рамках трукутника Польща-Словаччина-Україна. Творит то нагоду для обміну думками будуючима добросусідски відносини, а передо шитким зрозуміня для специфіки нашой культури і історії.
Свято Лемківской Культури зістало в 2007 роци одзначене през Капітулу Конкурсу Pro Publico Bono за найкраще громадске діло.

Лемківска Ватра несе зо собом передо шитким барз важливу місію – інтегрує шитких нас, нащадків Акції Вісла порозмітуваних по цілій Польщи і світі, власьні ту, на фалатику Земли наших Прадідів.
Ватра-вогнище, яке палиме в липни мусит загніздити ся в наших серцях аж до наступного рока. Є то своєрідний календар кожного Лемка. Рік рахуваний од липня до липня, од Ватри до Ватри.

Нашу Ватру підпорує багато прихильників, свойом жичливістю, добрим словом ци допомогом. Кожному з окрема щиросердечні дякуєме!

Як звучат слова пісні:
„То є та, єдина, під небом твоя Земля”
Лемківска Ватра в Ждини.