Бур’ян

Бур’ян то лемківско-польский фольковий ансамбль, створений в 2008 роци з ініцятиви Марка Ротко. Інспірує їх передо шитким лемківска музика – задля корени членів, та Бескиди – місце в яким мішаются культури українців, в тім лемків, поґужан, словаків, жидів та інчих. Перший концерт дали в рамках «Хвилі з русиньском-лемківском культуром» в Лісьцу. Товдиль то рішили проводити дальши проби і музикувати разом. Грали медже інчима на ватрах: в Ждини, Михалові, Олаві, Лугах ци Тиличи. Брали тіж участ в Молодіжним концерті етно і фольк музики во Львові, Краківских медженародних торгах народного мистецтва, сьпівали «Під Баранами» в Кракові, на фестівалі «Етнічни інспірації» в Варшаві, та во Вроцлаві. Веиким плюсом є їхня кооперація з публіком і велика еластичніст, зато барз добрі почуваются на великій і малій сцені, а не боятся тіж грати забави. Бур’ян фурт ся розвиват і глядат нових інспірацій.